Këshilli Mbikëqyrës i Bankës së Shqipërisë mori sot në shqyrtim dhe miratoi Raportin e Ndërmjetëm të Politikës Monetare.

Pasi diskutoi mbi zhvillimet ekonomike e monetare në vend dhe mbi ecurinë e pritur të tyre, Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit në 2.75%.

Gjithashtu u vendos të mbetet e pandryshuar norma e interesit të depozitës njëditore, në nivelin 1.75% si dhe norma e interesit të kredisë njëditore në 3.75%.

Në fjalën e tij, Guvernatori i BSH-së, Gent Sejko tha se ekonomia shqiptare ka pasur një ecuri pozitive në gjysmën e dytë të vitit.

“Aktiviteti ekonomik ka vijuar të rritet, inflacioni mbetet i ulët dhe nën kontroll, tregjet financiare shfaqen relativisht të qeta, ndërsa ritmet e rritjes së kredisë janë të larta. Këshilli Mbikëqyrës rikonfirmoi se politika monetare e Bankës së Shqipërisë ka pasur një rol të rëndësishëm në këtë ecuri, nëpërmjet kontrollit dhe reduktimit të inflacionit, pa dëmtuar trendin pozitiv të rritjes ekonomike dhe treguesit e shëndetit financiar të vendit”, u shpreh Sejko.

Guvernatori theksoi se inflacioni i çmimeve të konsumit regjistroi një nivel mesatar prej 2% gjatë muajve tetor dhe nëntor, nivel ky i njëjtë me atë të tremujorit të tretë.

Sipas tij, “qëndrueshmëria e inflacionit total pasqyroi rritjen e inflacionit të artikujve ushqimorë dhe reduktimin e inflacionit të qerasë, të naftës dhe të artikujve të konsumit afatgjatë. Inflacioni i artikujve të tjerë të shportës nuk pati ndryshime të ndjeshme”.

Sejko shtoi se ekonomia shqiptare ka vijuar të rritet në gjysmën e dytë të vitit, me ritme të ngjashme me ato të gjysmës së parë e ndikuar nga zgjerimi i konsumit, i investimeve dhe i eksportit të shërbimeve, dhe të jetë pasqyruar në zgjerim të aktivitetit në sektorin e shërbimeve dhe të industrisë.

“Zgjerimi i kërkesës për mallra e shërbime ka vijuar të pasqyrohet në rritje të pagave e të punësimit. Sipas të dhënave të INSTAT-it, pagat mesatare në sektorin privat u rritën me 5.4% gjatë tremujorit të tretë, duke shënuar një ngadalësim të lehtë krahasuar me tremujorin paraardhës. Ky ngadalësim tregon një lehtësim të presioneve në tregun e punës dhe është premisë për një ecuri më të qëndrueshme të çmimeve dhe të inflacionit në të ardhmen”, tha Guvernatori.

Tregu financiar, deklaroi, Sejko, ka pasqyruar sinjalet e politikës monetare, duke shfaqur prime të ulëta rreziku dhe norma të favorshme interesi.

Sa i takon tregut valutor, Guvernatori i BSH-së vuri në dukje se ka vijuar të karakterizohet nga presione mbiçmuese të Lekut ndaj monedhave të tjera.

“Analiza e të dhënave të bilancit të pagesave të tremujorit të tretë konfirmon se këto presione vazhdojnë të nxiten nga rritja e flukseve hyrëse valutore të ardhura nga turizmi, remitancat, si dhe investimet e huaja direkte. Megjithatë, krahasuar me vitin e kaluar, ritmi i mbiçmimit të kursit të këmbimit është zbutur, falë, ndër të tjera, edhe ndërhyrjeve të shtuara të Bankës së Shqipërisë për blerje valute”, deklaroi ai.

Burimi ATSH