Zëvendësministri i Brendshëm, Besfort Lamallari, sot në një postim në rrjetet sociale, bëri të ditur zhvillimin e një takimi të rëndësishëm në Tiranë, ku morën pjesë përfaqësues të autoriteteve policore dhe doganore nga Evropa Juglindore, së bashku me drejtues të Zyrës së Kombeve të Bashkuara për Drogën dhe Krimin (UNODC) dhe Organizatës Botërore të Doganave.

Lamallari theksoi se Shqipëria po shndërrohet gjithnjë e më shumë në një qendër rajonale dhe ndërkombëtare për takime të rëndësishme që fuqizojnë bashkëpunimin në zbatimin e ligjit.

“I lumtur që kësaj radhe mirëpritëm për herë të parë në Tiranë përfaqësues të autoriteteve policore dhe doganore të Evropës Juglindore, së bashku me drejtues të lartë të Zyrës së Kombeve të Bashkuara për Drogën dhe Krimin si dhe Organizatës Botërore të Doganave!”, shkruan Lamallari.

“Veprimi i përbashkët mes Komisionit Evropian dhe Kombeve të Bashkuara do të kontribuojë në siguri të shtuar, parandalim të krimeve të rënda, krimit të organizuar dhe terrorizmit përmes kontrolleve më cilësore dhe efektive, analizave të riskut dhe përdorimit të teknologjisë moderne!”, thekson Lamallari në postimin e tij.

Burimi: ATSH