Në Berat u organizua sot tryeza e rrumbullakët me Agjencinë Kombëtare të Ekonomisë së Mbetjeve (AKEM), përfaqësues të Bankës Gjermane për Zhvillim KFW dhe bashkitë e qarkut Berat, ku u diskutua mbi hapat e zbatimit të projektit të mbetjeve urbane për këtë qark.

Kryetari i bashkisë së Beratit, Ervin Demo tha se “në nisje të zbatimit të projektit patëm një koordinim të hapave ndërmjet partnerëve zbatues, në vijën e startit të tij”.

“Ky projekt do të bëjë të mundur ndërtimin e infrastrukturës për trajtimin e mbetjeve në përputhje me standardet e BE, nëpërmjet një landfilli rajonal, pajisje dhe makineri për pastrimin, grumbullimin dhe trajtimin e mbetjeve urbane, si dhe mbështetje teknike për stafet e bashkive”, theksoi Demo.

Projekti financohet nga qeveria Shqiptare, nëpërmjet Marrëveshjes me KFW dhe grantit nga qeveria zvicerane, nëpërmjet SECO.

Ndërkohë u mbajt sot në Tiranë konferenca “Menaxhimi i qëndrueshëm miqësor me klimën në sektorin e mbetjeve të ngurta”, në të cilën u prezantua programi i përbashkët i Ministrisë së Turizmit dhe Mjedisit me Bankën Gjermane për Zhvillim KfW dhe Kooperacionin Zviceran SECO mbi menaxhimin e qëndrueshëm të mbetjeve, koordinuar dhe monitoruar nga Agjencia Kombëtare e Ekonomisë së Mbetjeve.

Ky program prej 66 milionë euro siguron investime të rëndësishme në infrastrukturën e menaxhimit të integruar të mbetjeve në Durrës, Dibër, Korçë, Berat dhe Vlorën-Veriore që nga landfillet e mbetjeve urbane sipas standardeve europiane, landfille për mbetjet inerte, stacione transferimi, impiante të ndarjes së mbetjeve, qendra kompostimi apo investime në makineri për grumbullimin e diferencuar të mbetjeve me objektivin për të reduktuar me 20% sasinë e mbetjeve në pikat fundore falë proceseve të riciklimit.