Zv/kryeministrja dhe ministrja e Infrastrukturës dhe Energjisë, Belinda Balluku e cilësoi hap të rëndësishëm drejt integrimit europian, miratimin në mbledhjen e sotme të Komitetit Shtetëror për Integrimin Evropian të pozicionit negociues për grupkapitullin e themeloreve në negociata.

Balluku theksoi se, pas një procesi maratonë përgjatë 14 muajve, shtator 2022 – nëntor 2023, Shqipëria finalizoi procesin e vlerësimit të nivelit aktual të përgatitjes “Screening” për anëtarësimin në Bashkimin Evropian, duke përfshirë një pjesëmarrje të gjerë të të gjitha institucioneve dhe punonjësve publik.

Në takimin e sotëm pasi u shqyrtuan edhe rekomandimet e Raportit të Komisionit të Çështjeve Evropiane të Kuvendit të Republikës së Shqipërisë, u miratua Pozicionin Negociues i Republikës së Shqipërisë për Grupkapitullin e I-rë të Kapitujve “Themeloret”.

“Miratimi i këtij dokumenti përbën një hap të rëndësishëm në rrugëtimin e Shqipërisë drejt anëtarësimit në Bashkimin Evropian”, theksoi Balluku.