Përballja me zjarret në këto temperatura dhe terrene të vështira është një nga sfidat e mëdha të Forcave të Armatosura në këta muaj të nxehtë.

Ministri i Mbrojtjes Niko Peleshi ndau sot dëshminë e Kolonel Dritan Durmishaj, i cili është vetëm njëri nga ushtarakët e shumtë që sakrifikojnë çdo ditë në shërbim të atdheut dhe popullsisë civile.
“Mirënjohje për përkushtimin e paçmuar të çdo efektivi të angazhuar në këtë detyrë, për ndjenjën e përgjegjësisë dhe humanizmit dedikuar mbrojtjes së jetës së qytetarëve tanë, pronës së tyre dhe natyrës së vendit tonë”,u shpreh Peleshi.

Kolonel Durmishaj shpjegoi se çdo mision ka përgatitjen e vetë. “Mbase për ata që janë jashtë aviacionit duket shumë e thjesht, por për pilotët dhe teknikët duhet një kohë e caktuar që të përgatiten, të gjendet terreni ku do të fluturojë. Për mjetin ajoror sa më lart të jetë terreni aq më e vështirë është për të kryer operacionin për shkak të ngarkesës dhe kushteve meteorologjike”, u shpreh ai.

Duke folur për misionin e fundit, Kolonel Durmishaj u shpreh se “morëm një thirrje nga AKMC për një fshat në Klos, ku një masiv pyjor kishte marrë zjarr dhe për shkak të terrenit shumë të vështirë malor dhe të thepisur kërkohej edhe ndërhyrja e mjeteve ajrore”.

“Me të marrë sinjalin, ekuipazhet u përgatitën dhe filluan detyrën duke ndihmuar forcat zjarrfikëse të cilat ndodheshin në terren, por terreni ishte mjaft i thepisur dhe shumë i vështirë”, tha ai.