Presidentit Bajram Begaj iu dha sot titulli “Qytetar Nderi” i Komunës së Drenasit, për kontribut të shquar për Republikën e Kosovës dhe qytetarët e saj.

Kryetari i komunës, Ramiz Lladrovci teksa ka falënderuar presidentin Begaj për promovimin dhe fuqizimin e shtetit të Kosovës, ka nënvizuar se roli i tij edhe gjatë kohës së luftës ishte i madh.

Duke folur për ata që dhanë shumë për liri, Lladrovci ka kujtuar edhe ish-krerët e UÇK-së, të cilët mbahen në Hagë.

Në anën tjetër edhe Presidenti Begaj, derisa ka falënderuar për titullin, ka theksuar se historia e Drenasit është histori krenarie, ndërsa tha se qytetarët e saj kanë rol të rëndësishëm për gjithë vendin.

Ndërkaq, Begaj ka zhvilluar takim edhe në Qendrën për promovimin e të drejtave të grave në Drenas. (ATSH)