Ministri i Brendshëm, Taulant Balla e cilësoi sot një sukses të plotë operacionin NOMADA, për goditjen e një grupi kriminal që merrej me trafikimin e shtetasve shqiptarë drejt Anglisë dhe Irlandës përmes Spanjës.

Në një postim në rrjetet sociale, Balla theksoi se “po konsolidohet çdo ditë sundimi i ligjit ndaj krimit të organizuar dhe veprimtarive të tjera kriminale”.

Balla shprehu mirënjohjen për çdo punonjës të Policisë së Shtetit, që sipas tij, po ngre lart vlerat e uniformës dhe po respekton betimin ndaj flamurit, ligjit dhe qytetarëve.

Në kuadër të operacionit NOMADA, SPAK dhe GJKKO, caktoi masën e sigurimit personal “arrest në burg” për 31 shtetas për kryerjen e veprave penale “Ndihma për kalim të paligjshëm të kufijve”, e kryer në formën e bashkëpunimit të veçantë, “Falsifikimi i dokumentave”, kryer në formën e bashkëpunimit të veçantë; “Grupi i strukturuar kriminal” dhe “Kryerja e veprave penale nga organizata kriminale apo grupi kriminal”.