Kryeministri Edi Rama përcolli sot momente nga festimet e Karnavaleve në qytetin e Shkodrës, një nismë e bashkisë e përqafuar nga qindra qytetarë që u bënë pjesë e aktiviteteve të shumta dhe të larmishme.

Kryeministri Rama ishte i pranishëm në Shkodër ndërsa u bë pjesë e atmosferës rrugëve të Shkodrës në shoqërinë e kryebashkiakut Benet Beci.

Qindra qytetarë, të mëdhenj dhe të vegjël, i janë bashkuar nismës së bashkisë së Shkodrës për ta shndërruar qytetin në një “ballo me maska” për tre ditë e tre netë rresht, ndërsa aktivitetet e planifikuara kanë angazhuar dhjetëra të rinj e të reja.

Shkodra është qyteti që e ka festuar më herët Karnavalen. Festimet e para i përkasin gjysmës së dytë të shekullit XIX, saktësisht vitit 1860, duke krijuar një traditë solide që vazhdoi deri në vitin 1946, ku për shkak të regjimit komunist, u ndalua së festuari për t’u rikthyer sërish si traditë pas viteve ’90.