Nga Kliton Nesturi

UDHËTIM DREJT VETVETES

Udhëtoj drejt vetvetes…

Udhëtimi drejt vetvetes
Është si lundrimi një anije me vela
në detin e paqtë,
ndërsa dielli perëndon,
apo si një ecje në një rrugë të zakonshme
rrethuar nga gjelbërimi.

Njeriu e harron këtë
dhe endet ethshëm në jetët e të tjerëve
verbuar nga dashuria dhe përkushtimi,
kohë të tëra,
stinë pas stine,
vit pas viti,
një jetë,
duke u përplasur edhe me fortuna dhe dallgë
të pakuptimta,
menduar në një çast të thellë refleksioni.

Vetëm një çast,
kur përballet me veten
në pasqyrën e së vërtetës,
sheh se rrudhat janë shtuar,
flokët janë thinjur,
e se në shpirt pa kuptuar
harresa është shndërruar në plagë.
Çdokush ikën në jetën e tij,
ndërsa ai ndeshet me veten fillikat,
në një betejë dilemash dhe ekzistence.
Vetja përngjan si një kalorës
në një udhtëtim të mugët gri.
Udhëtimi nëpër jetët e të tjerëve
ka përfunduar në errësirë.
Brenda tij nuk ka asgjë,
pasionet kanë vdekur
dhe ëndrrat kanë humbur në harresë.
Vitet kanë shkuar…

Atë çast vendos
për të provuar udhëtimin drejt vetes.
Nuk është kurrë vonë
të ndezësh pasionet dhe të jetosh ëndrrat,
të nisësh lundrimin si anija me vela në detin e qetë,
apo të ecësh i ëmbël në udhën e rrethuar prej gjelbërimit.
Jeta nuk është vetëm vjeshtë.

Udhëtimi drejt vetvetes është udhëtimi më i magjishëm.
Vetëm atëherë, Njeriu ndihet Mbret
i fatit të tij.

gusht 2020

———————-

(Botuar ne librin “I lindur bohem”, Botimet M&B, 2023)