Nga Andrea Llukani

Shën Nikolla (+280) ka lindur në Azinë e Vogël dhe ishte episkop i Mirës.

Shën Nikolla ka hyrë në botën e fëmijëve evropianë si njeriu (Santa Claus) që sjell dhuratat e Vitit të Ri.

Në Gjermani atë e quajnë Veinachtsman që do të thotë Njeriu i Krishtlindjeve.

Në Francë quhet Pere Noel (Babai i Krishtlindjeve). Në Angli njihet me emrin Father Christmas (Babai i Krishtlindjeve), ndërsa në Hollandë e quajnë Santa Claus.

Tradita thotë se njëherë Shën Nikolla ishte duke udhëtuar nga Mira për në Hollandë. Ai kishte veshur rrobën e kuqe të episkopit, duke ngarë një kalë të bardhë dhe i shoqëruar nga shërbëtori i tij Black Bart.

Gjatë udhëtimit mbante një thes plot me dhurata të ndryshme. Sapo shihte fëmijë, ndalte kalin, fuste dorën në thes dhe u jepte dhurata.

Në udhëtim e sipër duke u gdhirë mëngjesi, ata panë një kasolle, e cila nuk kishte dritare dhe dyert qenë të mbyllura.

Shën Nikolla pyeti shoqëruesin e tij: –Si do t’ua shpërndajmë dhuratat fëmijëve?

Barti propozoi që dhuratat t’i hidhnin nga oxhaku.

Ata hipën në çatinë e kasolles dhe i hodhën dhuratat në oxhak. Mrekullisht dhuratat ranë në çorapet e fëmijëve, që kishin vënë për t’u tharë.

Që nga ajo kohë në traditën e popujve lindi një zakon i ri. Në ditën e Krishtlindjeve fëmijët blejnë çorape të mëdha dhe i varin ato në oxhak me shpresë që natën do të vijë Santa Claus dhe do t’u hedhi dhuratat.

Shën Nikolla ose Santa Claus është shenjti më i dashur për fëmijët, gjithashtu ai është mbrojtës i detarëve, udhëtarëve dhe endacakëve.