Delegacioni shqiptar nga nënkomisioni parlamentar për Objektivat e Zhvillimit të Qëndrueshëm, i kryesuar nga Eduart Shalsi, Milva Ekonomi, Sorina Koti, Pranvera Resulaj, zhvilloi takime në Palais des Nations, Gjenevë, me përfaqësues të lartë të UNDP-së dhe homologë parlamentarë.

Vizita e delegacionit shqiptar përkoi me 75-vjetorin e Kartës së të Drejtave të Njeriut. Fokusi i kësaj vizite ishte një eksplorim gjithëpërfshirës i objektivave të zhvillimit të qëndrueshëm dhe zbatimi i tyre në vendin tonë.

Vizita përfshiu takime me zyrën e UNDP-së në Gjenevë, ku u diskutua rreth objektivave të zhvillimit të qëndrueshëm, dhe se si parlamenti i mbështet ato në mënyrë aktive. Temat e trajtuara gjithashtu ishin në lidhjet që ata kanë me acquis të BE-së, rolin e sektorit privat në arritjen e tyre.

Në takimet me Unionin Ndërparlamentar u diskutua rreth punës së grupit parlamentar në promovimin e barazisë gjinore dhe përforcimin e ndikimit të grave në parlament.

Gjatë qëndrimit në Gjenevë, delegacioni pati një takim me Martin Chungong, Sekretar i Përgjithshëm i Unionit Ndërparlamentar, i cili theksoi rolin jetik të parlamentarëve në mbrojtjen e të drejtave të njeriut dhe avancimin e arritjeve të Objektivave të Zhvillimit të Qëndrueshëm.

Gjatë vizitës diskutimet u fokusuan edhe në rëndësinë e veprimeve parlamentare në mbështetje të luftës kundër ndryshimeve të klimës.

(Marrë nga ATSH)