Nga Dr. Bledar Kurti

Shkrimtari, dramaturgu, gazetari, intelektuali i njohur Bashkim Hoxha prej dekadash ka dhënë një kontribut të vyer në të gjitha sferat, dimensionet dhe ngjyrat e fjalës dhe të mendimit, duke e çimentuar emrin dhe penën e tij si shkrimtar profesionist dhe krijues i vërtetë.

Veprat e Bashkim Hoxhës janë kthyer në film, janë vënë në skena teatri, e gjenden në duart e lexuesve përmes një krijimtarie të re, pasi çdo vit ai sjell një vepër të re për shkak të përkushtimit të përditshëm ndaj të shkruarit.

Sa herë që takohemi diskutojmë për librin e ri që ka nisur sepse libri për të nuk është më thjesht pasion, thirrje, shtysë e kënaqësi, është frymëmarrje! Ndaj edhe ai shkruan çdo ditë.

Prej vitesh Bashkim Hoxha ka ideuar e drejtuar emisionin e mëngjesit “Koha për t’u zgjuar,” emisioni më i ndjekur televiziv në vend, por mesazhi që ai jep ka të bëjë edhe me zgjimim e shoqërisë, zgjim që e bën vetëm leximi, dija, kultura dhe emancipimi.