15 gushti është një nga ditët më të kremtuara për besimtarët e krishterë. Sot është Dita e Shën Marisë, ose sic njihet ndryshe “Fjetja e Hyjlindëses”, dita kur shenjtorja ju bashkua birit të saj, në botën e përjetshme.

Festa e Fjetjes së Hyjlindëses kremtohet në 15 gusht, e paraprirë nga dy javë agjërimi (kreshme). Kjo festë, e cila quhet edhe “Marrja”, është për të përkujtuar vdekjen, ngjalljen dhe lavdërimin e Nënës së Krishtit. Ajo shpall që Maria “u mor” nga Perëndia, në mbretërinë qiellore të Krishtit, në të përmbushurit e ekzistencës së saj trupore dhe shpirtërore.

Kisha Orthodhokse Autoqefale e Shqipërisë me këtë rast uroi besimtarët e veçanërisht ata që sot kanë ditën e emrit si, Maria, Marieta, Mariela, Mario, Marinela, Marika, Meri, Panajota, Dhespina, Verxhina, Xhina, të cilët mbajnë emrin dhe festojnë në nderim të Tërëshenjtës dhe Hyjlindëses. Kisha Orthodhokse Autoqefale e Shqipërisë ka zgjedhur të urojë me një ikonë të Fjetjes së Hyjlindëses Mari, afresk nga Manastiri “Shën Pjetri”, Vithkuq, Korçë.

“Fjetja e Hyjlindëses” është paraqitur në afresket e kishave të ndryshme orthodhokse, anembanë vendit, ashtu sikurse edhe “Lindja e Virgjëreshës” apo “Hyrja e saj në Tempull”.

15 gushti kremtohet edhe nga besimtarët katolikë në të gjithë botën. Zojës së Madhe, siç quhet ajo ndër katolikët shqiptarë, i janë kushtuar shumë kisha si ajo e Barbullushit në kryedioqezën metropolite të Shkodër-Pultit, ajo e Mamurrasit, në kryedioqezën metropolite të Tiranë-Durrësit, ajo e Kaçë-Naraçit në dioqezën e Sapës, ajo e Grudës dhe ajo në fshatin Kollomzë afër Ulqinit, në kryedioqezën e Tivarit, ajo e Letnicës në Karadak dhe ajo e Zymit të Hasit, në administraturën apostolike të Prizrenit në Kosovë.

Në trevat shqiptare Kishat kushtuar Virgjërës Mari janë dëshmi identiteti shpirtëror e kombëtar, thesar feje e arti. /ATSH