Në qytetin e Durrësit janë rindërtuar 20 objekte arsimore, ndërsa 17 të tjera janë në proces për të bërë të mundur mbylljen e programit të Rindërtimit me buxhetin e qeverisë shqiptare dhe donatorëve të huaj deri në vitin 2024.

Kështu u shpreh sot kryetarja e bashkisë së Durrësit, Emiriana Sako, e cila inspektoi punimet për rikonstruksionin dhe përforcimin e shkollës së mesme të bashkuar “Jusuf Hoti” në njësinë administrative të Katundit të Ri, që financohet nga Danimarka dhe Mbretëria e Bashkuar nëpërmjet programit CIS zbatuar nga UNDP.

Sako theksoi se përveç këtij objekti që është pjesë e programit të Rindërtimit në Katundin e Ri janë edhe dy objekte arsimore që janë realizuar me buxhetin e bashkisë. “Në total janë 7 objekte arsimore në këtë njësi administrative”, tha ajo.

Sako inspektoi edhe ndërtimin e godinës së re arsimore ku do të vendoset kopshti dhe shkolla fillore “Jusuf Hoti”, financuar nga buxheti i bashkisë së Durrësit.

Shkolla do të ketë 10 klasa, 3 laboratorë, sallë multifunksionale, bibliotekë, dhomë infermieri e psikologu.

Ndërsa godina e re arsimore do të ketë 7 klasa, dy për kopshtin dhe 5 për shkollën fillore, dhomë infermierie e ambiente të tjera.

Në përfundim të punimeve në këto objekte arsimore 330 nxënës dhe 40 fëmijë do të zhvillojnë procesin mësimor në ambiente me standarte bashkëkohore.

Sako theksoi po ashtu se bashkia është angazhuar për të rehabilituar terrenet sportive në çdo njësi administrative. /ATSH