Presidenti turk, Recep Tayyip Erdogan tha sot se homologu i tij rus, Vladimir Putin është në favor të zgjatjes së marrëveshjes që lejon eksportin e grurit ukrainas, ndërsa një vendim përfundimtar është ende në pritje.

“Ne jemi në marrëveshje me Putinin për zgjatjen e marrëveshjes së eksportit të grurit ukrainas përmes Detit të Zi”, tha Erdogan në Stamboll, disa ditë përpara se marrëveshja të përfundojë.

Është ende e paqartë se kur dhe si mund të zgjatej marrëveshja, e cila përfundon më 17 korrik.

Erdogan tha se pret që Putin të bëjë një vizitë në Turqi në muajin gusht.

Udhëheqësi turk shtoi se ai shpreson që marrëveshja të zgjatet, veçanërisht për t’u lejuar vendeve të varfra afrikane të kenë akses në ushqim.

Deklarata e Erdoganit vjen një ditë pasi Putin tha se zgjatja e marrëveshjes mbetej e varur nga përmbushja e kërkesave të adresuara nga Moska.

Ai tha se ekzistonte mundësia e pezullimit të pjesëmarrjes së Rusisë në marrëveshje derisa të realizoheshin kërkesat.

Marrëveshja e grurit, e ndërmjetësuar nga Turqia dhe OKB-ja, ka mundesuar eksportin e produkteve ukrainase nga portet e Detit të Zi, pavarësisht luftës së vazhdueshme me Rusinë.

Më herët, Erdogan tha se eksportet kishin arritur në rreth 33 milionë tonë.