Kryeministri Edi Rama reagoi sot pas ngjarjes së ndodhur në Kuvendin e Kosovës, ndërsa i bëri thirrje opozitës të distancohet nga kjo sjellje e turpshme.

“Të mos jesh dakord me kryeministrin është demokratike, ta shprehësh kështu kundërshtinë është të njollosësh veten, zgjedhësit e tu dhe krejt shtetin me një turp që sot i bën dëm Kosovës edhe ndërkombëtarisht, më shumë se sa çfarëdo qëndrimi politik që po ia kundërshton kryeministrit”, theksoi Rama.

Kryeministri Rama u shpreh se “imagjinojini si ndjehen aleatët dhe miqtë e pazëvendësueshëm të Kosovës e të shqiptarëve, kur shohin se si kapen për fyti shqiptarët, aty ku duhet të luftohet me ide e me fjalë, jo me sharje e me grushta”.

“Uroj shumë që opozita të distancohet nga kjo sjellje e turpshme dhe t’i shërbejë Kosovës me forcën e shembullit, jo me shembullin e forcës”, tha Rama.

Në Kuvendin e Kosovës teksa kryeministri Albin Kurti po mbante fjalën për marrëveshjen për shtensionimin e situatës në veri, ka ndodhur një përplasje fizike mes deputetëve të mazhorancës dhe opozitës./ATSH