Një delegacion i Komisionit për Çështjet Ligjore, Administratën Publike dhe të Drejtat e Njeriut, i kryesuar nga kryetarja Klotilda Bushka, po zhvillon një vizitë pune në Parlamentin e Portugalisë.

Në delegacion bëjnë pjesë deputetët Toni Gogu, Denis Deliu, Saimir Hasalla, Jurgis Çyrbja, Gazment Bardhi, Dhurata Çupi, Saimir Korreshi dhe Bledion Nallbati.

Gjatë takimit me kolegët deputetë të komisionit për Administratën Publike, Planifikimin e Territorit dhe Qeverisjes Vendore, delegacioni i Kuvendit diskutoi për përforcimin e bashkëpunimit mes dy komisioneve dhe dy parlamenteve, me qëllim shkëmbimin e përvojave në procesin legjislativ si edhe bashkëpunimin dhe ndihmën në rrugëtimin e Shqipërisë drejt Bashkimit Europian.

Diskutimet u fokusuan edhe në fuqizimin e autonomisë vendore dhe administratës publike cilësore, si standarde të rëndësishme për integrimin europian të Shqipërisë.