Në ambientet e Universitetit Webster u zhvillua Festivali i Gastronomisë, organizuar nga Lidhja e Gruas Shqiptare në Greqi – Σύνδεσμος Αλβανίδων Γυναικών στην Ελλάδα, i cili kishte për qëllim promovimin e gastronomisë, traditave dhe kulturës shqiptare në diasporë.

Sipas Ambasadës shqiprtare në Greqi, ky festival, i kthyer në traditë vjetore për shoqatën, bëri bashkë shtetas shqiptarë dhe të huaj, të cilët shijuan gatime tradicionale shqiptare, prodhime tradicionale, vepra artistike të punuara në dorë, kostume karakteristike popullore dhe u dha mundësinë shoqatave shqiptare pjesëmarrëse të prezantojnë dhe promovojnë traditën e tyre të veçantë kulinare dhe kulturore, duke u dhuruar të pranishmve një ndjenjë të veçantë me aromë Shqipërie.

Në emër të Ambasadës së RSH-së në Athinë mori pjesë Oficerja Koordinuese për Diasporën, Joneda Dodaj, e cila, pasi përgëzoi shoqatën për organizimin e këtij aktiviteti, i uroi suksese të mëtejshme në punën e saj dhe nënvizoi se Ambasada mbështet dhe do të vazhdojë të mbështesë çdo iniciativë që synon në promovimin e traditave dhe kulturës shqiptare në diasporë.