Shqipëria prezantohet në panairin e librit të Torinos.

Ministrja e Kulturës, Elva Margariti, e pranishme në ceremoninë e këtij eventi të rëndësishëm, u shpreh se, “rrethuar nga libra, autorë, lexues, botues nuk mund të ideosh veçse projekte që i përkasin kulturës”.

Margariti zhvilloi edhe një takim me homologun italian, Gennaro Sangiuliano, me të cilin diskutoi për çuarjen përpara të raportit mes dy vendeve tona.

“Programin kulturor që firmosëm një vit më parë me paraardhësin e tij dhe projekte të reja, lidhur me trashëgiminë kulturore do t’i çojmë përpara”, tha Margariti.

Stenda shqiptare është realizuar si një shpellë me gurë të mëdhenj, mbi njërin prej të cilëve gjendet mbishkrimi “Chronicle in Stone”, e cila i referohet romanit të shkrimtarit Ismail Kadare, “Kronikë në gur”.

Ashtu siç pati thënë edhe më herët, ministrja e Kulturës, Elva Margariti, stenda shqiptare në Sallonin e Torinos, do të flasë në gjuhën kadareane.

Për herë të parë Shqipëria është “vend mik” (“paese ospite”) në Sallonin Ndërkombëtar të Librit në Torino.

Në Sala “Albania” do të ketë rreth 40 aktivitete, prezantime e tryeza me emrat më në zë të letrave shqipe: Lea Ypi, Ornela Vorpsi, Bashkim Shehu, Lucia Nadin, Matteo Mandala, Enkel Demi, Ardian Ndreca, Fatos Kongoli, Ylljet Aliçka, Stefan Çapaliku, Durim Taçi, Rita Petro, Anilda Ibrahimi, Liridon Mulaj, Tobias Xhaxhiu, Andreas Dushi e shumë të tjerë.