Vizita zyrtare në NATO, Begaj takon Stoltenberg
Kreu i Shtetit do të ketë takim me Sekretarin e Përgjithshëm të NATO-s, Jens Stoltenberg
Presidenti Bajram Begaj do të zhvillojë një vizitë zyrtare në NATO më datë 7 mars 2023.
Presidenca njoftoi sot se Kreu i Shtetit do të ketë takim me Sekretarin e Përgjithshëm të NATO-s, Jens Stoltenberg, me të cilin do të diskutojë lidhur me zhvillimet strategjike dhe të sigurisë në krahun lindor të NATO-s dhe Ballkanin Perëndimor.
Gjithashtu, temë e diskutimeve do të jetë vijimi i mbështetjes për Ukrainën; angazhimi dhe kontributi i Shqipërisë në NATO, si edhe pritshmëritë për samitin e ardhshëm të NATO-s, që do të mbahet në Vilnius, Lituani, në korrik të këtij viti.
Në këtë vizitë zyrtare, Presidenti Begaj do të shoqërohet nga shefi i Shtabit të Përgjithshëm të Forcave të Armatosura të Republikës së Shqipërisë, gjeneralbrigade Arben Kingji dhe anëtarë të kabinetit të tij.
Kjo është vizita e parë zyrtare në NATO e Bajram Begajt në cilësinë e Presidentit të Republikës.
Në përfundim të takimit, në orën 13:00, Presidenti Begaj dhe Sekretari i Përgjithshëm i NATO-s, do të mbajnë një konferencë të përbashkët për shtyp.