Këshilli i Ministrave miratoi Planin Kombëtar për Integrimin Evropian 2023-2025 (PKIE 2023-2025).

Vendimi i qeverisë ngarkon ministrin e Shtetit dhe Kryenegociatoren të bashkërendojë dhe të monitorojë zbatimin e PKIE-së 2023-2025 me ministrat dhe/ose drejtuesit e institucioneve përgjegjëse për kryesimin e grupeve ndërinstitucionale të punës për integrimin evropian (GNPIE), si dhe negociatorin përgjegjës të secilit kapitull, të acquis-it të BE-së.

Negociatori përgjegjës për kapitullin e acquis-it të BE-së, raporton çdo javë, pranë ministrit të Shtetit dhe Kryenegociatores, për ecurinë e zbatimit të PKIE-së 2023-2025.

Ministri i Shtetit dhe Kryenegociatorja ngarkohet të raportojë çdo 3 muaj, në Këshillin e Ministrave për ecurinë e zbatimit të PKIE-së 2023-2025.

Ministria e Financave dhe Ekonomisë, në bashkëpunim me ministrin e Shtetit dhe Kryenegociatoren, do të monitorojë përfshirjen nga ministritë dhe institucionet e tjera qendrore, në programin buxhetor afatmesëm, të nevojave financiare për zbatimin e përparësive afatshkurtra dhe afatmesme, të parashikuara në PKIE-në 2023-2025. /ATSH