Kryetarja e Kuvendit, Lindita Nikolla priti sot në një takim ambasadorin e Egjiptit në Shqipëri, Mohamed Mustafa Heider.

Nikolla vlerësoi marrëdhëniet shumë të mira midis të dy vendeve dhe e vlerësoi Republikën e Egjiptit si një partner të rëndësishëm për ruajtjen e paqes dhe stabilitetit në Lindjen e Mesme.

Sipas saj, “bashkëpunimi ekonomik mes dy vendeve nuk i përgjigjet nivelit të marrëdhënieve politike”.

Në këtë drejtim, Nikolla u shpreh se “Shqipëria mirëpret investimet egjiptiane dhe bashkëpunimi mund të zgjerohet në sektorët e energjisë, transportit ajror e detar, bujqësisë, turizmit etj.”.

Ajo nënvizoi se intensifikimit të marrëdhënieve dypalëshe do t’i shërbejë edhe intensifikimi i bashkëpunimit parlamentar dhe përsëriti ftesën për Kryetarin e Dhomës së Përfaqësuesve, Hanafy Ali El Gebali, të vizitojë Shqipërinë.

Ambasadori Mohamed Mustafa Heider vuri në dukje se do të punojë për fuqizimin dhe intensifikimin e marrëdhënieve midis Shqipërisë dhe Egjiptit.

“Në themel të miqësisë midis dy vendeve qëndron edhe kontributi i diasporës shqiptare për zhvillimin e Egjiptit. Egjipti gjithashtu vlerëson rolin e Shqipërisë si një faktor sigurie, paqeje e stabiliteti në rajon e më gjerë”, shtoi ai.