Në ministrinë e Mjedisit u zhvillua takimi i pestë i Komitetit Drejtues të programit “Resilience and Green Development”.

Ky program është një platformë e përbashkët pune që mbështet konsolidimin e Shqipërisë drejt zhvillimit të qëndrueshëm dhe procesin e integrimit europian.

Ministri i Mjedisit, Sofjan Jaupaj tha se gjatë takimit diskutuam hapat konkretë, që nga forcimi i kuadrit të ekonomisë qarkulluese përmes ligjit të Përgjegjësisë së Zgjeruar të Prodhuesit, përmirësimin e sistemit të monitorimit të klimës dhe inventarit të gazeve serrë, si dhe menaxhimin e qëndrueshëm të zonave të mbrojtura me instrumente të reja financiare dhe plane të integruara menaxhimi.

“Përmes koordinimit institucional, arrijmë të kemi të dhëna të sakta për vendimmarrje, kapacitete në nivel qendror dhe vendor, si edhe investime që rrisin qëndrueshmërinë ndaj ndryshimeve klimatike duke mbrojtur biodiversitetin”, tha Jaupaj.

Burimi ATSH