Ministri i Mbrojtjes Pirro Vengu bëri sot të ditur se lumi Vjosa ka kaluar kuotat maksimale, ndërsa deri tani janë evakuuar 13 familje.

Në një prononcim për mediet nga Vlora, ku po monitoron nga afër situatën e përmbytjeve, Vengu informoi se situata po vështirësohet për shkak të rritjes së nivelit të lumit Vjosa.

Ministri theksoi se është bërë një plan masash për 3 fshatrat që janë më të rrezikuara, Bishan, Fitore dhe Novoselë.

Deri tani, Vengu informoi se janë evakuuar 13 familje dhe 200 krerë bagëti në një fermë.

“Presim një rritje të nivelit të ujërave. Presim të vijojmë operacion për evakuimin e bagëtive, Vjosa ka kaluar kuotat makinale. Janë evakuuar 200 krerë bagëti në një fermë. Po e bëjmë këtë në të dy anët e Vjosës dhe nga zona e Fierit. Ndërkohë do pozicionohen mjetet e larta të ushtrisë. Policia është në gatishmëri”, shtoi ai.

Ministri theksoi se furnizimi me energji elektrike dhe ujë është po ashtu në kushte optimale dhe nuk ka ndërprerje të natyrës shqetësuese.

Burimi ATSH