Ministri i Drejtësisë, Besfort Lamallari ishte sot në Durrës për të parë nga afër situatën e krijuar në IEVP-në e këtij qyteti pas vërshimit të ujit prej reshjeve intensive të orëve të fundit.

Ministri tha se ka qenë në monitorim të situatës prej orëve të para të ditës së sotme dhe janë marrë të gjitha masat e nevojshme për normalizimin e gjendjes.

“Janë marrë të gjitha masat e nevojshme me stakimin e energjisë elektrike në katin e parë dhe evakuimin e personave në katet më sipër. Gjithashtu në mbështetjen tonë kemi edhe pompat me kapacitet të lartë nga Ministria e Mbrojtjes për të larguar ujin”, tha ministri Lamallari, duke shtuar se po funksionon ndërkohë edhe Komisioni i Emergjencave Civile në Durrës për të garantuar që gjithçka të shkoj brenda normalitetit.

Drejtori i përgjithshëm i Burgjeve, Klevis Qose tha se situata është nën kontroll si dhe po kryhen furnizimet e nevojshme me mjete logjistike.

“Aktualisht situata është nën kontroll dhe në monitorim në çdo aspekt nga struturat përkatëse, ndërsa jemi në komunikim me drejtoritë rajonale të emergjencave civile, zjarrfikëseve dhe bashkive, ndërsa për momentin nuk ka problematika që cenojnë jetën e të burgosurve”, tha Qose.

Burimi ATSH