Ministrja e Ekonomisë dhe Inovacionit, Delina Ibrahimaj njoftoi sot se pas grevës së minatorëve në minierën e Spaçit, 11 prej tyre kanë rifilluar punën, ndërsa 35 të tjerë do të ripunësohen së shpejti.

Gjatë seancës plenare të së enjtes, në përgjigje të pyetjes së deputetes së opozitës Jorida Tabaku mbi situatën e minatorëve pas grevës, Ibrahimaj prezantoi masat e ndërmarra nga Ministria për të adresuar kërkesat e tyre për kushte pune dhe respektim të të drejtave nga kompanitë private.

Ministrja theksoi se javën e ardhshme do të zhvillohet një takim me minatorët, pasi greva e tyre aktualisht nuk është funksionale. Gjithashtu, do të kryhet një inspektim nga Inspektorati i Punës për të verifikuar kushtet e punës, orët e punës, diferencimin në paga dhe çdo rast të mundshëm të kërcënimeve gjatë periudhës së grevës.

“Ne do të hartojmë një raport të detajuar dhe do ta vëmë në dijeni Komisionin e të Drejtave të Njeriut për hapat e mëtejshëm që do të ndërmerren”, deklaroi Ibrahimaj.

Ibrahimaj, ritheksoi angazhimin e MEI për zgjidhjen e konfliktit në minierën e bakrit në Spaç (Mirditë) dhe arritjen e një marrëveshjeje mes palëve sipas kuadrit ligjor.

Konflikti i minatorëve në minierën e Spaçit me shoqërinë “TETE Albania Tunnel & Mining” sh.a., nisi pas pushimit të një punonjësi dhe u përshkallëzua në grevë nga rreth 40 punonjës gjatë periudhës 08-13 tetor 2025. Greva nisi para përfundimit të procesit të ndërmjetësimit, ndërsa Ministria e Ekonomisë dhe Inovacionit ndërmori të gjitha masat ligjore për të lehtësuar dialogun, duke organizuar takime ndërmjetësimi, përfshirë një takim trepalësh në muajin nëntor.

Marrë nga ATSH