Ministri i Mbrojtjes, Pirro Vengu zhvilloi një vizitë në Camp Butmir në Sarajevë, ku 31 efektivë shqiptarë shërbejnë përkrah vendeve partnere në kuadër të Forcës së Bashkimit Europian në Bosnjë dhe Hercegovinë, ALTHEA.

Në këtë kamp, Vengu u takua me komandantin dhe ekipin drejtues të misionit.

“Shqipëria është dhe do të jetë kudo ku Bashkimi Europian dhe NATO operojnë për të garantuar paqen dhe stabilitetin”, theksoi Vengu në një postim në rrjetet sociale.

Vengu shprehu përkushtimin për të rritur kontributin e Shqipërisë në kapacitete duke theksuar se “kjo do të sigurojë që trupat shqiptare të kenë kushtet optimale gjatë shërbimit”.

“Flamuri shqiptar qëndron krenar në krah të flamurit të NATO-s dhe atij të Bashkimit Europian”, tha Vengu.

Gjatë viteve, Shqipëria ka ndërtuar një histori të suksesshme dhe të denjë në angazhimet ndërkombëtare, si një vend anëtar i NATO-s dhe një partner i besueshëm në kuadër të Bashkimit Evropian.

Pjesëmarrja e saj në misionet e Bashkimit Evropian, si EUFOR “ALTHEA” dhe ai në Mali, ka dëshmuar profesionalizmin, disiplinën dhe përkushtimin e Forcave të Armatosura.

Efektivët shqiptarë iu bashkuan Forcës së Bashkimit Europian në Bosnjë dhe Hercegovinë, në shkurt të këtij viti.

Marrë nga ATSH