Kryeministri në detyrë i Kosovës, Albin Kurti, ka publikuar një mesazh urimi për Ditën e Flamurit, duke e cilësuar 28 Nëntorin si datën më të ndërlidhur me fatin historik të kombit shqiptar.

Kurti theksoi se rrugëtimi historik që fillon me ngritjen e flamurit të Kastriotëve në Kalanë e Krujës më 1443, vijon i pandërprerë përmes ngjarjeve kyçe që kanë shënuar kombin shqiptar ndër shekuj.

“Kjo ditë e 28-të e muajit të njëmbëdhjetë vërtet ishte një aksident historik i vitit 1443, por një aksident i këtillë, i përsëritur me kaq ngulm përgjatë historisë, doemos u kthye dhe u bë një shenjë e shenjtë e kalendarit tonë kombëtar”, shkruan Kurti.

Ai kujtoi edhe ngritjen e flamurit në Vlorë më 1912, duke sjellë në vëmendje vizionin e Sami Frashërit dhe dëshmitë e Luigj Gurakuqit.

Kurti përmendi edhe datat e rëndësishme të historisë së Kosovës: ditëlindjen e Adem Jasharit dhe paraqitjen e parë publike të Ushtrisë Çlirimtare të Kosovës më 28 nëntor 1997, duke i cilësuar si momente që vulosën rrugën drejt lirisë.

Në fund, Kurti uroi të gjithë shqiptarët kudo që ndodhen: “Gëzofshi 28 Nëntorin, Ditën e Flamurit!”.

Burimi ATSH