Në Universitetin “Fan S. Noli” në Korçë po vijon puna për ndërtimin e Polit të Dijes, një nga investimet më të rëndësishme në fushën e arsimit dhe inovacionit në qytetin e Korçës.

Kryeministri Edi Rama ndau sot në rrjetet sociale pamje nga puna që po kryhet për ndërtimin e godinës së re, e cila do të ketë një infrastrukturë moderne me hapësira të bollshme.

“Poli i Dijes, një hapësirë moderne që po e çon edukimin në Korçë në një nivel tjetër. Një qendër ku bashkohen arsimi, teknologjia dhe inovacioni, një investim që forcon rolin e Korçës si qytet i dijes dhe kulturës”, shkruan Rama.

Ky projekt i ri arsimor synon të krijojë një hapësirë bashkëkohore për studentët dhe të rinjtë, me auditorë, laboratorë, bibliotekë dhe ambiente moderne mësimore, që do të mundësojnë ndërthurjen e teorisë me praktikën dhe zhvillimin e kreativitetit.

Kjo njësi e re do të jetë një hapësirë e shtuar për universitetin, për të zhvilluar programet e reja inovative.

Me këtë kompleks, Universiteti “Fan S. Noli” siguron një infrastrukturë moderne për të akomoduar jo vetëm studentët korçarë, por edhe të tjerë nga Shqipëria dhe vendet e rajonit.

Burimi ATSH