Akti Normativ i miratuar nga Këshilli i Ministrave për Buxhetin e vitit 2025 i jep mbështetje të posaçme Ministrisë së Mbrojtjes, me synim forcimin e kapitalit njerëzor dhe të kapaciteteve operacionale të Forcave të Armatosura.

Ministri i Mbrojtjes Pirro Vengu bëri të ditur se përmes 1,9 miliardë lekësh fonde të alokuara, parashikohet nisja e prodhimit të armatimit, mjeteve dhe pajisjeve ushtarake “Made in Albania”, si dhe financimi i projekteve në infrastrukturën kritike të mbrojtjes.

Rreth 1.3 miliardë lekë janë rishpërndarë nga zërat e shpenzimeve kapitale drejt atyre korente, kryesisht për mbulimin e detyrimeve për paga dhe sigurime shoqërore.

Në programin “Emergjencat civile”, rreth 352 milionë lekë janë riklasifikuar nga shpenzimet korente në kapitale, për t’u përdorur nga bashkitë.

339 milionë lekë janë parashikuar për operacione dhe misione jashtë vendit, spitalin Universitar të Traumës dhe drejt projekteve në kuadër të NATO-s.

“Akti Normativ i jep buxhetit të Mbrojtjes mbështetjen e duhur për të forcuar kapitalin njerëzor dhe gjithë kapacitetet operacionale, për të nisur prodhimin e armatimit, mjeteve dhe pajisjeve ushtarake “Made in Albania”, si dhe për të financuar projektet në infrastrukturën kritike”, deklaroi Vengu.