Përmes kurseve të trajnimit profesional synohet përgatitja e duhur të rinjve që zgjedhin të punojnë në këtë sektor.

Në Qendrën e Formimit Profesional Publik në Gjirokastër kursi i guidave turistike, i hapur për herë të parë, po ndiqet me interes nga të rinjtë gjirokastritë.

Drejtoresha e Qendrës së Formimit Profesional Publik në Gjirokastër, Mihare Lapa, tha për ATSH-në se kursi i udhërrëfimit turistik i akredituar nga Ministria e Turizmit, u hap për herë të parë në këtë qendër në shtator të këtij viti dhe pritet të përfundojë në mars të vitit 2026.

Në këtë kurs janë 15 kursantë të regjistruar. Kursi zgjat 7 muaj dhe pas përfundimit kursantët pajisen me certifikata që njihen nga Ministria e Turizmit, e cila iu jep mundësi të punojnë si guida të licencuara.

Sipas saj, kursantët që marrin pjesë duhet të kenë mbaruar shkollën e mesme, të jenë mbi 18 vjeç dhe preferohen të kenë njohuri të gjuhëve të huaja.

“Gjatë kursit pjesëmarrësit fitojnë njohuri teorike mbi bazat dhe teknikat e udhërrëfimit turistik, rëndësinë e turizmit në ekonomi, strukturat akomoduese, operatorët turistikë, format e ndryshme të turizmit, si dhe kuadrin ligjor që rregullon këtë fushë. Krahas teorisë, kursi përfshin edhe praktikë në site arkeologjike, muze dhe vende me rëndësi historike e kulturore, ku kursantët ushtrojnë në mënyrë konkrete rolin e udhërrëfyesit turistik”, theksoi Lapa.

Ani Mahmutaj, një i ri që ndjek këtë kurs, tha për ATSH-në se ka shumë dëshirë të punojë në fushën e turizmit.

“E kam zgjedhur këtë drejtim sepse më pëlqen të njoh vende të reja, të komunikoj me njerëz dhe të promovoj bukuritë dhe kulturën e vendit tonë. Për këtë arsye vendosa të ndjek kursin e udhërrëfimit turistik, ku po mësoj si pjesën teorike, ashtu edhe atë praktike”, u shpreh ai.

“Përmes këtij kursi po fitoj njohuri mbi organizimin e udhëtimeve, rolin e udhërrëfyesit dhe rëndësinë e turizmit në Shqipëri. Mendoj se kjo eksperiencë do të më ndihmojë të bëhem një udhërrëfyes i përgatitur dhe të kontribuoj në promovimin e turizmit vendas”, tha Mahmutaj.

Ndërsa Olsi Sinani theksoi se ka pasur mundësinë të punojë në disa muze, përvojë që e ka ndihmuar të lidhet ngushtë me historinë, kulturën dhe trashëgiminë tonë kombëtare.

“Gjatë kësaj kohe kam kuptuar se turizmi luan një rol shumë të rëndësishëm në njohjen dhe vlerësimin e këtyre pasurive, ndaj dëshiroj të bëhem pjesë aktive e këtij sektori që po zhvillohet me ritme të shpejta në vendin tonë”, tha ai.

Qendra e Formimit Profesional Publik Gjirokastër prej disa vitesh u vjen në ndihmë të rinjve, por jo vetëm, me mundësinë e marrjes së një profesioni në disa fusha të ndryshme.

Pranë kësaj qendre ka pasur kërkesë të lartë për pjesëmarrje në kurse për guida turistike, hoteleri-turizëm, shërbime në bar dhe restorant, kuzhinë etj. Në këtë qendër 160 kursantë që përgatiten për të dalë në tregun e punës së shpejti.

Të gjithë kursantët në përfundim të ciklit mësimor pajisen me certifikatë. Sipas të dhënave këtë vit ka pasur një interes të lartë nga të rinjtë mbi 16 vjeç për ndjekjen e kurseve.