Një sërë aktivitetetesh artistiko-kulturore janë të programuara për t’u zhvilluar gjatë kësaj jave në Tiranë e qytete të tjera.

Ndër më të rëndësishmit mbetet Festivali Ndërkombëtar i Dancit i Tiranës (IDFT), festivali i cili hyn në javën e tij të tretë dhe të fundit. Pesë performanca do të zhvillohen në pika të ndryshme të qytetit: dy vepra të frymëzuara nga tradita mesdhetare në Teatrin Kombëtar të Operës dhe Baletit; një program me dy pjesë dhe hyrje të lirë në Teatrin Kombëtar – Arturbina, që fokusohet te forca dhe qëndrueshmëria e trupit; një performancë koreografike në Galerinë GOCAT; dhe një vepër kolektive në Piramidë, ku publiku bëhet pjesë e vetë performancës.

Qendra Kombëtare e Kulturës për Fëmijë njoftoi për shfaqjen “Kalorësi Hero”, një shfaqje që sjell në skenë historinë e kalorësit Guido, princit të guximshëm nga Andaluzia, i cili bie në dashuri me bukuroshen Arsinda. Kjo histori magjike do të vihet në skenën e Teatrit të Kukullave, në një shfaqje që bashkon humorin, fantazinë dhe mesazhet e vyera për të vegjlit. Fëmijët dhe prindërit mund ta ndjekin në datat 25 dhe 26 tetor.

Në kuadër të 80-vjetorit të themelimit të Kombeve të Bashkuara, vjen koncerti “Better Together” më 24 tetor, në Qendrën Kulturore të Kishës Ortodokse. Ky aktivitet do të jetë pjesë e Javëve Kulturore Ndërkombëtare.

Nga Javët Kulturore Ndërkombëtare kujtojmë dhe Ditët Kinemasë Kazake në Tiranë të cilat sjellin për publikun shqiptar tri filma nga Kazakhfilm, që pasqyrojnë historinë, emocionin dhe shpirtin e Kazakistanit përmes kinemasë bashkëkohore. Ato do të shfaqen sot dhe nesër, në Qendrën e Artit “Agimi”.

Në COD do të vijojë të qëndrojë hapur ekspozita “No Art Zone” nga Vladimir Myrtezaj.

Në galerinë “Nikolet Vasia” të Durrësit, deri në fundjavë do të mund të ndiqet ekspozita “Ndjesi” nga Emjona Stasi, ndërkohë po në Durrës do të zhvillohet sonte mbrëmja letraro-muzikore “Naim Frashëri-in memoriam”, tek Torra Veneciane.

Në Galerinë “FAB” vijojnë të qëndrojnë të ekspozuara punimet e piktorit Gazmend Leka, në ekspozitën me titull “Magjia e vizatimit”.

Në Shkodër, nesër çelet ekspozita “Lëkura në huazim”, e Idlir Kokës, kuruar nga Stefano Romano, tek Shkodra ArtHouse.

Burimi ATSH