Ministri i Mjedisit Sofjan Jaupaj, zhvilloi në Tiranë priti sot Drejtoren për Ballkanin Perëndimor në Komisionin Europian, Valentina Superti, në kuadër të Forumit të Investimeve BE–Ballkani Perëndimor.

Jaupaj tha se, në fokus të takimit ishte përshpejtimi i procesit të integrimit europian të Shqipërisë përmes përmbushjes së Kapitullit 27, që trajton çështjet e mjedisit dhe ndryshimeve klimatike.

Gjatë takimit, u theksua rëndësia strategjike e këtij kapitulli si një nga më sfiduesit, por edhe më të rëndësishmit në procesin e anëtarësimit.

Ministri bëri të ditur se Shqipëria po avancon me reforma ligjore, investime infrastrukturore dhe projekte të dedikuara për ekonominë qarkulluese, si pjesë e përpjekjeve për të ndërtuar një zhvillim të qëndrueshëm dhe të gjelbër.

“Jemi të angazhuar për të harmonizuar legjislacionin mjedisor me atë të BE-së dhe për të ndërtuar një ekonomi që respekton burimet natyrore, redukton ndotjen dhe promovon energjitë e rinovueshme” deklaroi ministri.

Jaupaj e cilësoi bashkëpunimin me Komisionin Europian një garanci të fortë që Shqipëria të ecën me hapa të sigurt drejt anëtarësimit në Bashkimin Europian, ndërsa theksoi se, “projektet në fushën e mjedisit janë një ndër prioritetet kryesore në këtë rrugëtim”.

Burimi ATSH