Ministri i Drejtësisë, Besfort Lamallari, priti sot nënsekretarin e Përgjithshëm të Kombeve të Bashkuara dhe administratorin në detyrë të United Nations Development Programme (UNDP), Haoliang Xu, me të cilin bisedoi për forcimin e bashkëpunimit dhe përparimin e përbashkët drejt arritjes së Objektivave të Zhvillimit të Qëndrueshëm, në kuadër të procesit të anëtarësimit të Shqipërisë në Bashkimin Europian.

Gjatë takimit, ministri Lamallari vuri në dukje mbështetjen e rëndësishme të UNDP-së dhe Austrian Development Agency në ngritjen dhe forcimin e sistemit të Ndihmës Juridike Falas.

“Falë UNDP dhe Agjencisë Austriake për Zhvillim ne kemi ngritur e forcuar sistemin e Ndihmës Juridike Falas. Një sistem funksional, gjithëpërfshirës dhe të qëndrueshëm të aksesit në drejtësi për shtresat në nevojë duke e bërë Shqipërinë një histori suksesi në rajon për këtë fushë”, u shpreh Lamallari.

Ai theksoi se qeveria shqiptare mbetet e angazhuar për të vijuar bashkëpunimin edhe në projekte të tjera që lidhen me drejtësinë sociale dhe gjinore, si dhe me forcimin e kapaciteteve profesionale të ofruesve të shërbimeve juridike.

Burimi ATSH