Kryeministri Edi Rama nënvizoi sot rëndësinë e ndërgjegjësimit të sektorit privat për investime në mbrojtjen kibernetike.

Rama iu drejtua sot me një fjalë konferencës së 3-të të Mbrojtjes Kibernetike të NATO-s, që mblodhi në Tiranë delegacione nga 32 vendet anëtare të Aleancës, të përfaqësuara nga ministritë e Jashtme, të Mbrojtjes dhe “cyber ambassadors”.

Kryeministri Rama tha se duhet bërë shumë më tepër për ta përfshirë sektorin privat dhe për t’i ndërgjegjësuar që sulmi kibernetik është real dhe dëmi që mund të bëjë është real.

“Mund t’ju them se si kanë ecur gjërat me sektorin financiar, me bankat. Pasi kaluam këtë sulm të cilit i mbijetuam nga një vend që na vë në shënjestër sistematikisht, por që tashmë jemi shumë më të mirëpozicionuar, u thamë bankave se jemi nën shënjestër të aktorëve të mëdhenj, jo të një aktori të vogël, angazhohuni, investoni dhe të bashkëpunojmë. Jemi gati t’ju ofrojmë dijen tonë dhe t’ju ndihmojmë. E morën shumë lehtë. Pastaj një prej tyre u desh të përballej me këtë gjë dhe e kuptoi se ishte vërtetë shumë keq”, informoi Rama.

Ndërkohë, Kryeministri theksoi se “tani mund të themi me paksa çlirim se kur vjen puna te sektori bankar, niveli i mbrojtjes është i lartë, po aq sa është i lartë kur vjen fjala për sektorin energjetik”.

Kryeministri shprehu bindjen se ka ende shumë më tepër për t’u bërë dhe të gjitha vendet duhet të përballen me këtë vështirësi, që ta përfshijnë e të bëjnë që sektori privat të angazhohet me shpejtësinë që lejon koha në të cilën jetojmë.

Burimi ATSH