Kryeministri Edi Rama bëri të ditur sot se do të zbatohen formula të reja të planifikimit urban për sa i përket shtimit të hapësirave për këmbësorët dhe uljes së shpejtësisë së mjeteve në blloqet e banimit.

Gjatë punimeve të konferencës ndërkombëtare Walk21, në Tiranë, Rama bëri të ditur se për këtë do të diskutohet me Salvador Rueda-n, president i Fondacionit të Ekologjisë Urbane dhe Territoriale, si dhe themelues dhe drejtor i Agjencisë së Ekologjisë Urbane të Barcelonës nga viti 2000 deri në vitin 2020.

“Jam super i lumtur të ndaj me ju lajmin shumë të mirë për ne, që kemi arritur të marrim një hapësirë në agjendën mjaft të zënë të një gjeniu. Nuk e di sa e njihni Salvador Rueda i cili është person i cili ka bërë superblloqet në Barcelonë, që kanë sjellë dhe vazhdojnë të sjellin një ndryshim të jashtëzakonshëm në qytet, duke krijuar shumë më tepër hapësirë për njerëzit që ecin dhe duke i detyruar makinat që kalojnë, ato super blloqe të ecin me një shpejtësi shumë të ulët”, tha Rama.

Kryeministri theksoi se kjo është një formulë e jashtëzakonshme e mjaft e bukur që ka shumë rezultate pozitive për kujdesin shëndetësor.

“Ka rezultate pozitive si për mbrojtjen nga infarktet për të moshuarit për shkak të ngrohjes apo të ekspozimit për një kohë shumë të gjatë në diell në rrethana ku qarkullimi është i papërballueshëm apo trafiku është i papërballueshëm ashtu edhe në kujdesin për astmën dhe kështu me radhë. Për të mos folur pastaj për ndikimin shumë pozitiv sa i takon jetës në komunitet, ndikim i jashtëzakonshëm”, tha Rama.

Kryeministri theksoi se “ne do ta provojmë dhe do të përpiqemi që të fusim më shumë prej kësaj në qytetet dhe kryeqytetin tonë”.

Po ashtu, Rama shprehu bindjen se “do të kemi ndërtesa të jashtëzakonshme falë arkitekteve të shkëlqyer që punojnë më shumë me peizazhin që sjell natyrë dhe pemë në qytet”.

Burimi ATSH