Kryeministri Edi Rama njoftoi sot se në raport me sipërfaqen e ndërtuar, subjektet ndërtuese kanë detyrimin ligjor të dorëzojnë pemë në fondin e gjelbër.

Kjo është një tjetër masë e përcaktuar tashmë me ligj, që i detyron ndërtuesit të plotësojnë këtë detyrim.

Rama sqaroi se krijimi i fondit të gjelbër përcakton detyrimin që subjektet ndërtuese të garantojnë një sasi të caktuar pemësh në raport me sipërfaqen e ndërtimit dhe rregullat e posaçme për krijimin e këtij fondi do të përcaktohen me vendim të Këshillit të Ministrave.

“Nëse një subjekt ndërtues është pajisur me një leje ndërtimi për një objekt me një sipërfaqe 5 mijë metra katrorë, me këtë masë të re në ligj i lidhet menjëherë detyrimi për të garantuar një numër të caktuar pemësh në raport me sipërfaqen që do të ndërtojë”, tha Rama.

Kryeministri theksoi se ky është një plan që është përpunuar dhe në funksion të tij do të krijohen fidanishtet publike në pjesë të ndryshme të territorit.

“Në ato fidanishte subjektet do të sjellin pemët. Nuk do të jetë më historia që ‘unë do të mbjell dhe shikojeni’. Do të ketë një katalog për pemët, do të jenë parametrat e përcaktuara dhe subjektet do të dorëzojnë pemët. Kush ndërton më shumë, do të mbjellë më shumë pemë”, theksoi Kryeministri.

/Burimi ATSH