Java Kulturore Hungareze u çel sot në Tiranë me aktivitetin sportiv të Teqball, një kombinim unik i futbollit dhe tenisit të tavolinës.

Aktivitetet sportive u zhvilluan pasditen e sotme në Shkollën e Biçikletave dhe në Parkun e Liqenit në Tiranë.

Të rinjtë kryeqytetas zhvilluan këtë lojë dinamike dhe plot sfida, e cila mund të luhet në dyshe ose në teke, ku lojtarët përdorën çdo pjesë të trupit përveç duarve dhe krahëve.

Gjatë aktivitetit u zhvillua edhe ceremonia e dorëzimit të dy tavolinave Teqball, dhuratë nga Ministria e Punëve të Jashtme e Hungarisë, një tavolinë tek Shkolla e Biçikletave dhe tjetra tek Parku i Madh i Liqenit, sheshi tek kisha e Shën Prokopit.

I njohur zyrtarisht nga organizata të mëdha sportive, Teqball është përfshirë në Lojërat Evropiane 2023 dhe synon të bëhet edhe sport olimpik. Që nga prezantimi i tij në Budapest në vitin 2016 – me Ronaldinhon si ambasador, ky sport ka fituar zemrat e futbollistëve dhe fansave në mbarë globin.

I shpikur në Hungari në vitin 2014, Teqball u njoh si sporti më i shpejtë në botë që fitoi status ndërkombëtar. Sot përfaqësohet nga Federata Ndërkombëtare e Teqball (FITEQ) dhe vazhdon të frymëzojë lojë të ndershme, kreativitet dhe një stil jetese të shëndetshëm.

Aktivitetet e Javës Kulturore Hungareze do të zhvillohen nga sot deri më 2 tetor. Kjo javë sjell një përvojë të pasur, ku historia dhe traditat ndërthuren me krijimtarinë bashkëkohore, duke ofruar një eksperiencë përmes artit, muzikës, modës dhe gastronomisë autentike.

Burimi ATSH