Kryeministri Edi Rama vlerësoi sot se nanoshkenca dhe nanoteknologjia janë shkenca kampione të shekullit të XXI ndaj dhe është domosdoshmëri harmonizimi i arsimit të lartë me strategjinë për novacionin.

Gjatë punimeve të Kongresit Ndërkombëtar të Nanoteknologjisë, Rama bëri të ditur se “një sërë universitetesh shqiptare po hartojnë programe ndërdisiplinore për sistemet digjitale, inteligjencën artificiale dhe së shpejti për nanoshkencat”.

“Ky nuk është një luks apo diçka shumë e veçantë. Kjo është një nevojë e së tashmes. Vizioni ynë është që brenda dekadës tjetër, çdo i ri shqiptar që aspiron të studiojë teknologjitë e së ardhmes, të mund ta bëjë këtu në shtëpi”, shtoi Rama.

Kryeministri theksoi se do të kërkohen partneritete me universitetet europiane dhe institutet kërkimore, duke u siguruar që kurrikula jonë të përputhet me standardet më të larta ndërkombëtare.

“Është një punë që ka nisur e po shohim tashmë hapat e para dhe po kështu po shohim edhe rezultatet e para që janë inkurajuese. Ky investim në arsim nuk ka të bëjë vetëm me prodhimin e shkencëtarëve a inxhinierëve, por ka të bëjë me krijimin e një hapësire për njerëzit që të mendojnë në mënyra novatore, të krijojnë një brez novatorësh, që do të çojnë përpara ekonominë, industrinë e qeverisjen shqiptare përpara”, shtoi Rama.

Kryeministri siguroi se “Shqipëria është shumë e angazhuar që çdo euro e investuar në shkencë, të përkthehet në përparim të prekshëm, në llogaridhënie dhe në mundësi për të rinjtë”.

“E nuk ka aspak dyshim që ashtu siç disa prej jush që kanë ardhur nga jashtë mund ta shohin tashmë, ky është një vend shumë i hapur, shumë miqësor dhe është një vend ku fjala ‘’mirë se erdhët’’, është në përputhje të përkryer me atë çfarë mund të presësh kur vjen në këtë vend”, u shpreh kryeministri.

/Burimi ATSH