Dhjetë mami të Spitalit Universitar Obstetrik Gjinekologjik “Mbretëresha Geraldinë” janë në pritje të ëmbël për t’u bërë nëna në të njëjtën kohë.

Rastësia e bukur është fiksuar në një foto që u nda sot në rrjetet sociale nga Kryeministri Edi Rama.

10 mami shtatëzëna të veshura me uniformën blu, para hyrjes së maternitetit “Mbretëresha Gerladinë” është pamje që nuk e ndesh shpesh.

Në punën e tyre të përditshme mamitë kujdesen për nënat që sjellin në jetë të vegjlit e tyre. Disa prej tyre do ta provojnë për herë të parë ndjesinë më të bukur në jetë për një grua, ardhjen në jetë të një fëmije dhe të tjera presin fëmijën e dytë.

“Një rastësi e bukur, 10 mami të maternitetit “Mbretëresha Geraldinë” në të njëjtin udhëtim mëmësor”, shkruan Rama.

10 mamitë po përjetojnë së bashku mrekullinë e shtatzënisë. Ato që çdo ditë kujdesen me përkushtim maksimal për gruan, nënën dhe foshnjën, sot mbajnë edhe vetë bekimin më të madh, jetën brenda tyre.

Materniteti “Mbretëresha Geraldinë” ofron kushte me standardet më mira për mjekët, infermieret dhe mamitë. Gjithashtu aty ofrohen shërbimet më të mira si për nënat dhe bebet që vijnë në jetë.

Me përfundimin së shpejti të rikonstruksionit, materniteti do të jetë i pajisur me 360 shtretër, do të ketë 7 salla operacioni dhe 6 lindjeje, terapi intensive të dyfishuar, urgjencë dhe triazh modern, shërbim i ri për prematurët dhe shtatzënitë e rrezikuara.

Burimi ATSH