Rrugët e Shqipërisë nga data 5-15 shtator po transformohen në një paradë klasike falë mbërritjes së Fiat Topolino-s legjendare në kuadër të turit “Conoscere l’Albania”.

Turistët italianë, bashkë me pasionin e tyre për makinat retro kanë sjellë në vendin tonë bukurinë e simbolit të historisë automobilistike.

Pas Krujës, ndalesa e radhës këtë fundjavë ishte qyteti i Përmetit, ku qytetarë të shumtë, por edhe turistë të huaj kanë treguar interes për automjetet retro.

Mjetet e vendosura në sheshin kryesor të qytetit bashkuan historinë, natyrën dhe pasionin për automjetet klasike, duke e bërë Përmetin pjesë të këtij udhëtimi unik që lidh Shqipërinë me Italinë.
Ky tur është vetëm fillimi i një udhëtimi të jashtëzakonshëm që do t’i çojë turistët e huaj në qytete dhe vende të mrekullueshme shqiptare.

Mjetet retro do të kalojnë edhe në Tiranë, Berat, Vlorë, Sarandë, Butrint, Gjirokastër, Korçë, Pogradec, etj, duke i ofruar publikut mundësinë të admirojë nga afër këto automjete.

Fiat Topolino, i prodhuar për herë të parë në vitin 1936, konsiderohet si një nga simbolet e motorizimit masiv në Evropë. Sot, ta shohësh atë të parakalojë nëpër fshatrat dhe brigjet historike të Shqipërisë do të jetë një mundësi unike për të rriturit dhe fëmijët, entuziastët dhe kuriozët.