Shqipëria pret për herë të parë mbledhjen e Komitetit Ekzekutiv të UEFA-s, duke u kthyer në skenën e një prej ngjarjeve më të rëndësishme të qeverisjes së futbollit evropian.

Prej ditës së sotme, 10 shtator 2025 dhe deri të premten e 12 shtatorit, Federata e Futbollit do të presë në Tiranë drejtuesit më të lartë të federatave të kontinentit, anëtarët e Komitetit Ekzekutiv të UEFA-s, të kryesuar nga Presidenti Aleksander Čeferin.

Kreu i qeverisë së futbollit evropian do të mbërrijë pasditen e sotme në aeroportin e Rinasit, ku do të pritet nga Presidenti i FSHF-së, Armand Duka.

Sipas agjendës, ditën e nesërme në orën 09:00, në “Shtëpinë e Futbollit” në Tiranë do të zhvillohet një festival futbolli për fëmijë, pjesë e programit të UEFA-s “Futbolli në Shkolla”. Ceremoninë hapëse do ta nderojnë me praninë e tyre Presidenti i UEFA-s Aleksander Čeferin dhe Presidenti i FSHF-së, Armand Duka

FSHF njofton se pikat kryesore që do të diskutohen në mbledhjen e Komitetit Ekzekutiv në Tiranë janë caktimi i vendeve pritëse të finaleve të e UEFA Champions League 2027, UEFA Women’s Champions League 2027, UEFA Futsal Champions League 2026, UEFA Futsal Under-19 EURO 2027 dhe UEFA Women’s Futsal EURO 2027.

Në rend dite janë edhe tre çështje të tjera si shpërblimet për finalet e UEFA Women’s Nations League 2025, miratimi i rregulloreve të Kampionatit Evropian të Futsalit për vajza dhe rregulloret e fazës kualifikuese evropiane për Kupën e Botës FIFA Futsal 2028.