Gjatë fjalës së tij në Konferencën e Ambasadorëve, Guvernatori i Bankës së Shqipërisë, Gent Sejko, deklaroi se Shqipëria nis zyrtarisht pagesat në euro në zonën SEPA (Single Euro Payments Area) duke filluar nga 7 tetori 2025.

Ai e cilësoi këtë një zhvillim të rëndësishëm për sistemin financiar dhe procesin e integrimit europian të vendit. “Ky hap e konsideron Shqipërinë të integruar në BE në aspektin e pagesave në fushën financiare”, tha Sejko.

Sejko sqaroi se Banka e Shqipërisë, në bashkëpunim me institucionet përgjegjëse, ka përmbushur të gjitha kërkesat ligjore dhe rregullatore që i hapin rrugën përfshirjes së plotë të Shqipërisë në këtë sistem të unifikuar pagesash. Ai theksoi se Komisioni Evropian i Pagesave ka pranuar tashmë të gjitha bankat shqiptare, të cilat do të operojnë në sistemin SEPA nga tetori i vitit të ardhshëm.

“Ky është një hap madhor që e pozicionon Shqipërinë si një vend tërësisht të integruar në sistemin financiar europian,” u shpreh Guvernatori.

SEPA përfshin aktualisht 41 vende, përfshirë vendet e Bashkimit Evropian, disa shtete nordike dhe Mbretërinë e Bashkuar. Ky sistem mundëson transferta në euro me shpejtësi më të madhe, standarde të unifikuara dhe kosto shumë më të ulëta krahasuar me sistemet tradicionale ndërkombëtare.

Shqipëria dhe Mali i Zi janë pranuar formalisht si anëtaret më të reja të zonës SEPA në nëntor të vitit 2024, duke u konsideruar gjerësisht si një arritje strategjike në fushën e financës dhe transparencës.

Sejko nënvizoi se përveç ligjit për shërbimet e pagesave, janë miratuar edhe akte nënligjore dhe reforma për forcimin e bazës ligjore në luftën kundër pastrimit të parave, çka ka ndikuar pozitivisht në procesin e pranimit.

Ai deklaroi se nga ky proces ka përfitime të drejtpërdrejta për ekonominë dhe biznesin.

“Përfshirja në SEPA sjell përfitime konkrete për qytetarët, bizneset dhe investitorët: Transferta më të shpejta në euro nga dhe drejt vendeve të BE-së; kosto më të ulëta bankare për pagesa ndërkombëtare; rritje të transparencës dhe efikasitetit në sistemin bankar dhe besueshmëri më e lartë për investitorët e huaj”, u shpreh Guvernatori.

“Ky hap ul ndjeshëm kostot për ekonominë dhe rrit imazhin e Shqipërisë në tregjet e huaja, duke e bërë vendin më tërheqës për investime të huaja” theksoi Sejko.

Burimi ATSH