Kryeministri Edi Rama u shpreh sot se në sektorin e ujit janë bërë investime masive nga ana e qeverisë qendrore, por nga ana tjetër niveli i papërgjegjësisë dhe paaftësisë në pushtetin vendor në pika të caktuara është i frikshëm.

Gjatë prezantimit të krijimit të Operatorit të Ujit, Rama theksoi se “nga 4 zona që furnizoheshin me ujë 24 orë në vitin 2013 dhe me humbje në rrjet që shkonin afro 70%, sot kemi një panoramë tërësisht ndryshe”.

“Por, ama, në raport me atë që ishte, jo në raport me sfidën që kemi. Aq më tepër në kushtet kur ne duam të shkëlqejmë në turizëm dhe volumi i kërkesës për ujë në sezonin e pikut turistik rritet në mënyrë marramendëse, ndërkohë që kapaciteti për furnizimin është tërësisht i pamjaftueshëm dhe niveli i papërgjegjësisë dhe paaftësisë në pushtetin vendor në pika të caktuara është i frikshëm”, shtoi Rama.

Kryeministri solli në vëmendje shembullin e Vlorës, e cila e nisi sezonin turistik të këtij viti me një situatë të papranueshme dhe të pajustifikueshme të alarmit të zonave për furnizimin me ujë.

“Nuk është se ne bëmë ndonjë investim ato ditë, por thjesht dhe vetëm komandimi me një mision të posaçëm i një ekipi të vogël nga Tirana dhe me vëmendjen e posaçme nga ministrja për ta vënë në vijë me ato që gjendeshin, administrimi solli një përmirësim të jashtëzakonshëm të asaj situate dhe të paktën hoqi ankthin dhe pasigurinë, ndjesinë e emergjencës dhe alarmin se nuk kemi ujë”, theksoi Rama.

Kryeministri theksoi se nga raporti i bërë nga ai ekip për situatën e administrimit të ujësjellësit të Vlorës, është i frikshëm niveli i papërgjegjshmërisë.

“Solla rastin konkret duke qenë se flasim për një nga pikat më atraktive dhe të ngarkuara si rezultat i turizmit por ka edhe plot raste e pika të tjera”, shtoi Rama.

Burimi ATSH