Parku “Dua të luaj” në Berat është një tjetër hapësirë çlodhëse dhe rekreative për qytetarët dhe turistët që vizitojnë këtë qytet.

Kryeministri Edi Rama ndau në rrjetet sociale pamje nga ky park rekreativ, i ndërtuar nga Fondi Shqiptar i Zhvillimit në kuadër të programit “Dua të luaj”, që po zhvillohet në disa bashki.

Në park janë mbjellë 300 pemë, ka kënd lojërash, pistë vrapimi, kalçeto, fushë basketboll, fushë volejbolli, fushë tenisi, fushë padel, ambiente të gjelbra dhe stola për të pushuar.

Projekti “Dua të luaj” synon rritjen e mirëqenies së komunitetit dhe dhënien e mundësisë për zhvillimin motorik të brezave të rinj.

Ky projekt konsiston në ndërtimin e këndeve që mundësojnë zhvillim të aftësive motorike të fëmijëve të moshave të ndryshme dhe që aksesohet nga të gjithë; rimodelimin apo përmirësimin e këndeve të lojërave ekzistues të degraduar, me qëllim rritjen e aksesit dhe bashkëveprimin me elementet natyrorë; si dhe krijimin e infrastrukturave të cilat ndikojnë në sigurinë për grupmoshat 0-14 vjeç, si p.sh., sinjalistikë në infrastrukturën rrugore, barriera dhe hapësira urbane rrethuese në këndet ekzistuese, etj.

/Burimi ATSH