Në Tiranë po zhvillohet sot Etapa e Dytë e Giro d’Italia për edicionin e 108-të të këtij eventi. I pranishëm ishte edhe kryeministri Edi Rama i cili ka bërë edhe valëvitjen e flamurit për nisjen e çiklistit të parë.

“Giro d’Italia në kryeqytetin e Europës së Ballkanit”, shprehet në një postim në rrjetet sociale kryeministri Rama teksa ka publikuar një video me një nga organizatorët e eventit i cili vlerëson organizimin e këtij eventi madhor sportiv dhe mikëpritjen në Shqipëri

Çiklistët do përshkruajnë 13.7 kilometrat e një gare kronometri e cila është e gjitha në rrugët e kryeqytetit, me një malore në Sauk.

Gara nisi që nga Sheshi “Skënderbej” rreth orës 13:30, në drejtim të Bulevardit “Gjergj Fishta”, pastaj nëpërmjet Bulevardit “Bajram Curri” drejt sheshit “Nënë Tereza”, në Rrugën e “Elbasanit” drejt Saukut, rikthehen në Bulevardin “Bajram Curri”, nga Ura e Brrylit drejt Bulevardit “Dëshmorët e Kombit”, deri tek Sheshi “Nënë Tereza”, ku rreth orës 17:15 është parashikuar të përfundojë xhiroja.

Në kuadër të zhvillimit të etapës së dytë të garës ndërkombëtare të çiklizmit “Giro d’Italia”, Policia e Tiranës do të ndalojë qarkullimin dhe parkimin e automjeteve në disa akse kryesore në Tiranë.

Burimi ATSH