Muzeu “Marubi” në Shkodër ka hyrë në listën e vendeve që duhen vizituar për turistët në këtë qytet ndërsa tashmë është edhe pjesë e kujtesës botërore të UNESCO-s.

Ministri i Ekonomisë, Kulturës dhe Inovacionit, Blendi Gonxhja ndau sot në rrjetet sociale pamje nga ky muze mbushur me vizitorë.

“Marubi, një destinacion i preferuar për vizitorët tashmë pjesë e Regjistrit Ndërkombëtar të UNESCOs, Memory of the World!’, shkruan Gonxhja.

Arkiva e negativëve, objekteve dhe dokumenteve të Pietro dhe Kel Marubit është shpallur pjesë e Regjistrit Ndërkombëtar të Kujtesës së Botës nga UNESCO, duke e renditur kështu ndër trashëgimitë më të çmuara të njerëzimit.

Programi “Memory of the World” i UNESCO-s synon të ruajë dhe promovojë dokumentet më të rëndësishme të historisë njerëzore në të gjithë globin.

Burimi ATSH