Kryeministri, njëherësh kryetari i Partisë Socialiste, Edi Rama deklaroi sot se në qarkun e Beratit gjatë 12 viteve janë investuar 582 milionë euro.

Në fjalën e tij gjatë një takimi në Dimal, Berat për Shqipërinë 2030 në Bashkimin Europian, Rama tha se “sa i përket infrastrukturës rrugore në qarkun e Beratit janë kryer 203 projekte me vlerë 210 milionë euro për 255 km rrugë të investuara, ku janë rrugë me asfalt, rrugët e bardha që nuk janë të asfaltuara, por të shtruara siç janë në vende të Bashkimit Evropian në hapësira të thella rurale dhe një pjesë janë rrugë dheu, por të investuara dhe shtruara për t’u bërë të aksesueshme, kështu është siguruar 95% akses”.

“Patjetër që hap pas hapi aty ku është e nevojshme do të fillojë zëvendësimi i rrugëve të bardha dhe të dheut me rrugë me asfalt ose të bardha”, tha Rama.

Sa i përket rigjenerimit urban, Rama tha se “janë 78 projekte, 59 milionë euro i janë dhënë këtij qarku.

Lidhur me investimet në turizëm dhe mjedis, Rama tha se “janë kryer 26 projekte me vlerë 18.7 milionë euro. Këto janë investime të qeverisë për t’i dhënë këtë profil turistik që ka qarku”.

“Në ujësjellës-kanalizime janë realizuar 71 projekte me vlerë 108 milionë euro, në fushën e energjisë janë kryer 38 projekte me vlerë 60 milionë euro, në fushën e bujqësisë 57 projekte me vlerë 18 milionë euro. Në arsim janë bërë 54 projekte me vlerë 19.5 milionë, në kulturë 36 projekte me vlerë 22.5 milionë euro. Janë një shifër që është më e madhe se për shifrën për kulturën e të gjithave qeverive të marra së bashku”, theksoi Rama duke shtuar se për shëndetësinë dhe kujdesin social janë realizuar 48 projekte me vlerë 65 milionë euro.

Burimi ATSH