Kryeministri Edi Rama, njëherësh kryetar i Partisë Socialiste ka kërkuar ndjesë në lidhje përdorimin shprehjen “autizëm politik” gjatë një fjalimi elektoral.

Rama tha se ka admirim për të gjithë prindërit e fëmijëve me aftësi të veçanta dhe për këtë ka nxitur dyfishimin e mbështetjes së tyre nga qeveria.

Nëpërmjet një video të postuar në rrjetet sociale mbrëmjen e sotme, Rama u shpreh: “Mirëmbrëma, është vonë por nuk mund të mos e ndaja dot këtë reflektim. Të gabosh është njerëzore, ndërsa të mos kërkosh ndjesë kur gabon nuk është burrërore.

“Krejt pa dashje sot kam cenuar fëmijët autikë dhe me siguri kam lënduar prindër të tyre duke folur për autizëm politik, shprehje që diku më ka mbetur në mendje sepse është përdorur shpesh edhe në literaturën politike akademike dhe më doli sot krejt pa dashje. Por ja që u desh të gaboja, pastaj të mësoja se prej vitesh konsiderohet e papërshtatshme, dhe në fakt me plot të drejtë, prandaj kërkoj ndjesë dhe u garantoj se kam jo respekt, por admirim për të gjithë prindërit e fëmijëve me aftësi të veçanta ose speciale, siç i quajmë, çka edhe më ka shtyrë të nxis dyfishimin e mbështetjes së tyre nga qeveria, gjë që e kam thënë në më shumë sesa një rast kohët e fundit dhe do të jetë pjesë e projektbuxhetit të vitit 2026”, tha Rama.

Një përgjigje kishte edhe për opozitën.

“Ndërsa lehaqeniet që i kam nga pas dhe që u kapën pas fëmijëve autikë si i mbyturi pas fijes së barit për të fituar ndonjë pikë në sytë e atyre prindërve të nderuar, u jap fjalën që kjo do të jetë një motiv më shumë që ta shpenzoj çdo energji timen deri më 11 maj t’u japim mësimin më të merituar për të gjitha prapësitë e panumërta në kurriz të këtij vendi dhe në kurriz të këtij populli”, tha Rama.