Shqipëria nuk është më vendi i analfabetizmit digjital të një dekade më parë, pasi në vitin 2013 kishte vetëm 256 ndërmarrje në sektorin e teknologjisë digjitale, ndërsa në 2023 ishin 4175 ndërmarrje.

Kryeministri Edi Rama ndau pasditen e sotme shifrat ndërsa risolli në rrjetet sociale pjesë nga fjala në Kuvendin Kombëtar Rinor të Partisë Socialiste mbajtur të shtunën.

Duke iu referuar shifrave, Rama theksoi se në vitin 2013 kishte vetëm 998 të punësuar në atë sektor, ndërsa në vitin 2023 ka 14 974 dhe ky, vijoi Kryeministri, është vetëm fillimi.

“Kishte zero laboratorë inteligjentë në shkolla, vetëm ca klasa me kompjutera të prishur, sot ka 340 laboratorë inteligjentë dhe brenda vitit 2026 do të jenë 985 laboratorë inteligjentë”, tha Rama.

Kreu i qeverisë nënvizoi se teknologjia po krijon çdo ditë mundësi të reja.

“Shqipëria nuk është më vendi i analfabetizmit digjital të një dekade më parë, ku eksportet e produkteve dhe të shërbimeve të teknologjisë digjitale në vitin 2013 ishin 7 milionë euro, ndërsa në vitin 2023 ishin 183 milionë euro”, u shpreh Rama. /j.p/